miércoles, noviembre 23, 2016

El día las alcordancias...

Siempres sintiera dende piquinnina la frax “Dious nos llibre del día las alcordancias...” Sabiduría popular que guei día nun se tresmite (cumu tantas outras cousas) a los más nuevos pesia que sige siendu totalmente autual.

Imaxinu que yá sabedes que vou falare sobru la muerte de la ex-alcaldesa y ex-númberu tres del PP, Rita Barbera.

Cumu ya dixera mueitas vueltas, cualisquiera muerte ye triste dende'l puntu vista humanu (y mueitu más pa la sua familia y los sous collacios) peru dende'l puntu vista políticu (que ye lu que facen nel Congresu y nel Senáu) alcuentru que lu del minutu silenciu ye d’una gran hipocresía y tou cierta que más d'un respira guei mueitu más tranquilu (y non precisamente ente los que nun apreciábamos nin las suas idegas, nin las suas autuaciones).

Alcuentru realmente vergonnosu que los sous ex-companneiros, que van poucos días fizun el vacíu a Rita Barberá nel Senáu (taredes d’alcuerdu cumiéu que paecía una apestada, sola y ensín naide que ye falara), nun lu esqueicemos, falen agora de “cacería” tentandu de crïare la relación de causa-efeutu ente’l procesamientu de Rita Barberá y la sua muerte.

Y sobru tóu me chirrían las pallabras de Luisa Fernanda Rudi falandu de “crítica política”. Non sinnora, a Rita Barberá lu que ye llevóu a sere procesada nun fou la crítica política, fou la tema la corrución que s’ensennoreara del PP (y tamién d’outros partíos peru agora tamos falandu del PP) dende va mueitu tiempu cuasi ensín consecuencias.

You nun tou d’alcuerdu cunas idegas y autuaciones del PP peru nunca nun pediría que naide seya xulgáu pur eillu. Ensín embargu, DESIXU que tolos políticos que tean implicaos en casos de corrución devuelvan tolu que se llevaron y pagen cun cárcel pulu que fizun.

Y lu que de verdá ye “pa nota” son las pallabras del ppepperu que rimpuendiera a Pablo Iglesias diciendu, ensín despeinase y cun total esverguenza, qu’hai cincu millones d’hespañoles que padecen pobreza enerxética n’Hespanna y que Iglesias yes “utilizaba” pur nomalos.

Y pa los que se yes facen los dedos guéspedes, falu de TOLOS partíos, anque nesti momentu tea falandu del PP purque Rita fou una las más cimeiras políticas que’l PP tuvu y tendrá en tola sua hestoria.

Gueyandu las nuevas na tele y sintiendu a tantos y tantos sedicentes “pais de la patria” criticandu l’autuación de Podemos, nun puéu deixare d’annedire unas reflesiones que paez que nesti país toos tenemos “memoria de pez”.

Creigu que nun hubu minutos de silenciu nel Parlamentu nin pur Santiago Carrillo, nin pur Manuel Fraga (pur nun nomare más que a dous presonaxes representativos del estáu políticu y de la transición) peru lu más sangrante, na mia opinión, ye que la muerte de Labordeta pasóu ensín pena, nin gloria.

Nun deixa de tenere’l sou aquel que dalguna xente fale de “respetu” pulos difuntos. El respetu hai que merecelu nun vien “de serie”. Cumu yá dixera enantias tolas muertes son tristes y nun cellebru denguna peru, de verdá ¿daquien puede creere que Rita Barberá merez más respetu que Labordeta?

¿Onde taban tolos políticos del PSOE y del PP (creigu que d’aqueilla nun taban nel Congresu nin Ciutadans, nin Podemos) cuandu nnegaron un minutu silenciu a un home bonu y honráu cumu José Antonio Labordeta? ¿Sedrá qu’hai que tare acusáu de corrución pa tenere dreichu a la reconocencia?

¡Ah! y nun votu, nin votaréi a Podemos peru tampoucu tendría feichu’l minutu silenciu.

2 comentarios:

Andrea Campazas dijo...

Qué alegría leer esta frase: “Dious nos llibre del día las alcordancias...”, que tantas veces he escuchado en casa. Efectivamente, así es como hablamos en la ribera baja del Esla (o del Ástula, como aún dice mi abuela Norina). Es un placer ver reproducida aquí la lengua de mi pueblo, Bariones, que de otro modo pasaría desapercibida y como inexistente, tal como tercamente se empeña en hacernos creer la administración autonómica vallisoletana.

Alfréu Salamanca dijo...

Eisautu, Andreya. Asina mus trata l'almenistración del inxendru autunómicu: inorándumus.
En Salamanca tamién sofrimus la ucultación de la nuesa llengua materna. You sou de Dieus-ye-Guarde, diócesis de Ciarrudrigu, y eillina tamién dicimus esa mesma frase, se acausu con unus cambius particulares qu'arrispuenden a las características del llïonés meridïunal: "Dieus mus guarde del día las alcurdancias".

Pregón del I Encuentro de Cultura Tradicional "Valle de Gordón"

La Pola de Gordón, 14 de mayo de 2022 Buenas tardes: Es para mí un gran honor pregonar este I Encuentro de Cultura Tradicional “Valle de...